ក្នុងឱកាសនោះ ឯកឧត្តមប្រធាន បានធ្វើកិច្ចស្វាគមន៍ និងថ្លែងអំណរគុណដល់សមាជិក-សមាជិកានៃគណៈកម្មការជំនាញទាំងអស់ដែលបានស្ម័គ្រចិត្តជួយគណៈមេធាវី និងបានណែនាំឱ្យយកចិត្តទុកដាក់ប្រឹងប្រែង ពង្រឹងនិងពង្រីកការផ្សព្វផ្សាយច្បាប់ និងវិជ្ជាជីវៈមេធាវី និងសំណូមពរឲ្យសមាជិក-សមាជិកាគណៈកម្មការទាំងអស់ចូលរួមធ្វើជាវាគ្មិនសិក្ខាសាលា និងវគ្គបណ្តុះបណ្តាលផ្សេងៗ និងស័្មគ្រចិត្តសរសេរអត្ថបទសម្រាប់ព្រឹត្តិបត្រ ដោយគោរពអនុវត្តឱ្យបានខ្ជាប់ខ្ជួនតាមច្បាប់ស្តីពីលក្ខន្តិកៈមេធាវី ក្រមសីលធម៌វិជ្ជាជីវៈមេធាវី និងបទបញ្ជាផ្ទៃក្នុង ដើម្បីលើកកម្ពស់ឧត្តមភាព និងកិត្យានុភាពនៃវិជ្ជាជីវៈមេធាវី។ បន្ថែមពីនេះទៀត ក៏មានការរាយការណ៍អំពីសកម្មភាពការងាររបស់គណៈកម្មការជំនាញ ផងដែរ។

ជាចុងក្រោយ ឯកឧត្តមប្រធាន សូមជូនពរ ឯកឧត្តមអគ្គលេខាធិការដ្ឋាន អគ្គលេខាធិការរង លោកប្រធាននាយកដ្ឋានស្រាវជ្រាវ បោះពុម្ព និងផ្សព្វផ្សាយ លោក-លោកស្រីប្រធានគណៈកម្មការជំនាញ លោក-លោកស្រីអនុប្រធាន និងសមាជិក-សមាជិកាគណៈកម្មការជំនាញទាំងអស់ ទទួលបានជោគជ័យក្នុងភារកិច្ចការងារ ជោគជ័យក្នុងការប្រកបវិជ្ជាជីវៈ និងសុំរួមគ្នាដើម្បីលើកតម្កើងឧត្តមភាព និងកិត្យានុភាពនៃវិជ្ជាជីវៈមេធាវី។