នៅព្រឹកថ្ងៃព្រសហ្បត្តិ៍ ៥រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី២៧ ខែធ្នូ ឆ្នាំ២០១៨  នៅទីស្តីការក្រសួងយុត្តិធម៌ លោកមេធាវី សួន វិសាល ប្រធានគណៈមេធាវីបានដឹកនាំគណៈប្រភិភូ ជួបពិភាក្សាការងារជាមួយ ឯកឧត្តម អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ លើរបៀបវារៈចំនួន ៤ គឺ៖

១-ការធ្វើវិសោធនកម្មច្បាប់ស្តីពីលក្ខន្តិកៈមេធាវី ។

២-ការរៀបចំសិក្ខាសាលារួមគ្នាក្នុងគោលបំណងពង្រឹងវិស័យយុត្តិធម៌។

៣-ជំនួយផ្នែកច្បាប់សម្រាប់ជនក្រីក្រ។

៤-អគាររដ្ឋបាលរបស់មជ្ឍមណ្ឌលបណ្តុះបណ្តាលវិជ្ជាជីវៈមេធាវី។

 

ជាលទ្ធផលនៃជំនួបពិភាក្សាអង្គប្រជុំបានសម្រេច៖

១-ការធ្វើវិសោធនកម្មច្បាប់ស្តីពីលក្ខន្តិកៈមេធាវី ត្រូវបន្តអនុវត្តតាមយន្តការក្រុមការងារដែលមានស្រាប់ ដោយសហការជាមួយក្រសួងពាណិជ្ជកម្ម និងធ្វើរបាយការណ៍មកក្រសួងយុត្តិធម៌អោយបានឆាប់។

២-ឯកឧត្តមរដ្ឋមន្រ្តីបានឯកភាពជាគោលការណ៍ រៀបចំសិក្ខាសាលារួមគ្នារវាងគណៈមេធាវី និងក្រសួងយុត្តិធម៌ ដើម្បីពង្រឹងវិស័យយុត្តិធម៌។

៣-ចំពោះជំនួយផ្នែកច្បាប់សម្រាប់ជនក្រីក្រ អង្គប្រជុំបានឯកភាពគ្នាថានឹងស្នើសុំទៅក្រសួងសេដ្ឋកិច្ច និងហិរញ្ញវត្ថុ ដើម្បីសុំបង្កើនថវិកាជួយសំណុំរឿងក្តីជនក្រីក្រ បន្ទាប់ពីបានទទួលរបាយការណ៍លទ្ធផលការងារលំអិតពីគណៈមេធាវី។

៤-ចំពោះអគាររដ្ឋបាលរបស់មជ្ឍមណ្ឌលបណ្តុះបណ្តាលវិជ្ជាជីវៈមេធាវី ឯឧ រដ្ឋមន្រ្តីស្នើអោយបង្កើតក្រុមការងារមួយដើម្បីពិភាក្សាលំអិតពីករណីនេះ។ 

កិច្ចប្រជុំបានបញ្ចប់ទៅក្រោមបរិយាកាសយោគយល់ និងស្និតស្នាលជាទីបំផុត។