|
សុន្ទរកថា ឯកឧត្តម ជីវ សុងហាក់ ប្រធានគណៈមេធាវី នៃព្រះរាជាណាចក្រកម្ពុជា ក្នុងពិធីចុះហត្ថលេខាលើអនុស្សារណៈសហប្រតិបត្តិការរវាងគណៈ មេធាវីនៃព្រះរាជាណាចក្រកម្ពុជា និងមេធាវីគ្មានព្រំដែនប្រទេសបារាំងប្រចាំនៅកម្ពុជា |
 |
 |
 |
|
ថ្ងៃច័ន្ទ ទី24 ខែឧសភា ឆ្នាំ2010 ម៉ោង 13:58 |
|
ថ្ងៃទី ២២ ខែ មីនា ឆ្នាំ ២០១០ នៅ សណ្ឋាគារ រ៉ាហ្វល់ ឡឺ រ៉ូយ៉ាល់
-
ឯកឧត្តម អង្គ វង្សវឌ្ឍានា រដ្ឋមន្រ្តីក្រសួងយុត្តិធម៌ ជាទីគោ រព
-
ឯកឧត្តម S.E. DESMAZIERES (ដេម៉ាហ្សែរ) ឯកអគ្គរដ្ឋទូតប្រទេសបារាំងប្រចាំនៅព្រះរាជាណាចក្រកម្ពុជា ជាទីគោរព
-
លោក Martine Jaccuin (ម៉ាទីន សាកាំង) ប្រធានមេធាវីគ្មានព្រំដែន ប្រទេសបារាំងប្រចាំនៅព្រះរាជាណាចក្រកម្ពុជាជាទីរាប់អាន
-
ឯកឧត្តម លោក លោកស្រី អ្នកនាង កញ្ញា សមាជិក សមាជិកា ក្រុមប្រឹក្សាគណៈមេធាវីនៃព្រះរាជាណាចក្រកម្ពុជា ជាទីមេត្រី
ថ្ងៃនេះគឺជាទិវាដ៏មានសារៈសំខាន់សម្រាប់គណៈមេធាវីនៃព្រះរាជាណា ចក្រកម្ពុជា និង សម្រាប់រូបខ្ញុំផ្ទាល់ ដែលបានរៀបចំ ពិធីចុះហត្ថលេខាលើអនុស្សារណៈសហប្រតិបត្តិការរវាងគណៈមេធាវីនៃ ព្រះរាជាណាចក្រកម្ពុជា និងមេធាវីគ្មានព្រំដែនប្រទេសបារាំង។
ឆ្លៀតក្នុងឱកាសនេះ ខ្ញុំសូមស្វាគមន៍យ៉ាងកក់ក្តៅបំផុត ចំពោះ ឯកឧត្តម អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ និងឯកឧត្តម S.E DESMAZIERES (ដេម៉ាសហ្សែរ)ឯកអគ្គរដ្ឋទូតប្រទេសបារាំងប្រចាំនៅព្រះរាជាណាចក្រកម្ពុជា ដែលបានអញ្ជើញចូលរួមធ្វើជាអធិបតី និងសាក្សីក្នុងពិធីចុះហត្ថលេខានាថ្ងៃនេះ។
ខ្ញុំសូមស្វាគមន៍ផងដែរចំពោះ ឯកឧត្តម លោកជំទាវ ភ្ញៀវជាតិ និងអន្តរជាតិ លោក លោកស្រី សមាជិក សមាជិកា ក្រុមប្រឹក្សាគណៈមេធាវីដែលបានចូលរួមក្នុងពិធីថ្ងៃនេះ។
នេះគឺជាកិច្ចសហប្រតិបតិ្តការលើកទី២ រវាងគណៈមេធាវីនៃព្រះរាជាណាចក្រកម្ពុជា និងមេធាវីគ្មានព្រំដែនប្រទេសបារាំង សម្រាប់រយៈពេល២ឆ្នាំ គឺចាប់ពីខែ មីនា ឆ្នាំ ២០១០ រហូតដល់ខែ មីនា ឆ្នាំ២០១២ លើសកម្មភាពសំខាន់ៗមួយចំនួនដូចជា៖
-
ពង្រីកសេវាជំនួយផ្នែកច្បាប់ ជាពិសេសធ្វើអោយកាន់តែប្រសើរនូវសិទ្ធិទទួលបានការការពារតាម ផ្លូវច្បាប់សម្រាប់ប្រជាពលរដ្ឋទន់ខ្សោយនៅគ្រប់តុលាការខេត្ត រាជធានីទូទាំងប្រទេស
-
បង្រៀនគ្រូបង្គោលសម្រាប់មជ្ឈមណ្ឌលបណ្តុះបណ្តាលវិជ្ជាជីវៈមេធាវី
-
បណ្តុះបណ្តាលមេធាវីអំពីនីតិ និងគោលការណ៍ជាសារវន្តជាតិ និងឧបករណ៍អន្តរជាតិនានា ស្តីពីសិទ្ធិមនុស្ស ដល់មេធាវីកំពុងប្រកបវិជ្ជាជីវៈ និងសិស្សមេធាវី
-
ចូលរួមចំណែកក្នុងដំណើរការគណៈកម្មការកិច្ចការព្រហ្មទណ្ឌ និងបោះពុម្ពផ្សាយតាមរយៈព្រឹត្តប័ត្ររបស់គណៈមេធាវី
-
ការតស៊ូមតិតាមផ្លូវតុលាការ និងសកម្មភាពមួយចំនួនដែលព្រមព្រៀងដោយគណៈមេធាវី និងមេធាវីគ្មានព្រំដែនប្រទេសបារាំង
តាមរយៈនេះ គណៈមេធាវីនៃព្រះរាជាណាចក្រកម្ពុជា ជាអ្នកផ្តល់មេធាវី ដើម្បីបំពេញនូវសកម្មភាព និងតួនាទីខាងលើ និងមេធាវីគ្មានព្រំដែនប្រទេសបារាំងជាអ្នកផ្តល់ថវិកា
គណៈមេធាវីនៃព្រះរាជាណាចក្រកម្ពុជា និងខិតខំប្រឹងប្រែងអនុវត្តអោយមានប្រសិទ្ធភាពទទួលបានលទ្ធផលល្អ និងសមិទ្ធផលថ្មីៗថែមទៀត ដែលកើតចេញពីកិច្ចសហប្រតិបត្តិការនេះ
ខ្ញុំសង្ឃឹមថា មេធាវីគ្មានព្រំដែនប្រទេសបារាំង នឹងជួយគណៈមេធាវីនៃព្រះរាជាណាចក្រកម្ពុជា នូវកង្វះខាត និងគម្រោងផ្សេងៗទៀតដែលចាំបាច់ក្នុងការចូលរួមពង្រឹងយុត្តិធម៌ និងភាពស្អាតស្អំ នៅកម្ពុជា ព្រោះយើងដឹងហើយថា មេធាវីគឺជាចលករមួយ ដែលធ្វើអោយគ្រប់នីតិវិធីនៅតុលាការដំណើរការទៅដោយរលូន សមធម៌ យុត្តិធម៌ គោរពសិទ្ធិមនុស្ស ដើម្បីបំពេញនូវតួនាទីនេះបាន មេធាវីម្នាក់ៗត្រូវមានចំណេះដឹងផ្នែកច្បាប់គ្រប់គ្រាន់ គោរពច្បាប់ គោរពនូវក្រមសីលធម៌ វិជ្ជាជីវៈ និងជាគំរូល្អដល់សាធារណជន ។
ជាថ្មីម្តងទៀត ខ្ញុំសូមថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម អង្គ វង្សវឌ្ឍានា រដ្ឋមន្រ្តីក្រសួងយុត្តិធម៌ និង ឯកឧត្តម S.E. DESMAZIERES (ដេម៉ាហ្សែរ) ឯកអគ្គរដ្ឋទូតប្រទេសបារាំងប្រចាំនៅព្រះរាជាណាចក្រកម្ពុជា ដែលបានចំណាយពេលវេលាដ៏មានតម្លៃ ចូលរួមជាអធិបតី និងជាសាក្សីក្នុងពិធីចុះលើហត្ថលេខាលើអនុស្សារណៈនាពេលនេះ និងសូមថ្លែងអំណរគុណដល់ឯកឧត្តម អស់លោក លោកស្រី ភ្ញៀវជាតិ អន្តរជាតិ សមាជិក-សមាជិកាក្រុមប្រឹក្សាគណៈមេធាវី សមាជិក-សមាជិកាគណៈមេធាវី ដែលបានចូលរួមក្នុងពិធីថ្ងៃនេះ ។
ជាទីបញ្ចប់ខ្ញុំសូមជូនពរដល់ឯកឧត្តម លោកជំទាវ អស់លោក លោកស្រី អ្នកនាងកញ្ញា ភ្ញៀវជាតិ និងអន្តរជាតិ ដែលបានចូលរួមក្នុងពិធីចុះហត្ថលេខានាពេលនេះ សូមប្រកបតែសេចក្តីសុខ សេចក្តីចម្រើន និងទទួលបានពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។ សូមអរគុណ!
|
តើការដឹកនាំរបស់ខ្ញុំអាណត្តិនេះដូចម្តេចដែរ? សូមចុចទីនេះដើម្បីវាយតម្លៃ!
