ថ្ងៃទី ២១ ខែ មករា ឆ្នាំ ២០១០
នៅ សណ្ឋាគារ​សាន់វេ​

• ឯកឧត្តម ច័ន្ទ តានី រដ្ឋលេខាធិការ ទីស្តីការគណៈរដ្ឋមន្រ្តី​ តំណាង​ដ៏ខ្ពង់ខ្ពស់​ ឯក​ឧត្តមបណ្ឌិត​ សុខ​ អានឧបនាយករដ្ឋមន្រ្តី​ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី​ ជាទីគោរព
• លោក ​Flynn Fuller (ផ្លីន ហ្លូល័រ) នាយក​បេសកម្ម​ ទីភ្នាក់ងារ​សហរដ្ឋ​អាមេរិក​ ដើម្បី​អភិវឌ្ឍន៍​អន្តរជាតិ​​នៅកម្ពុជា ជាទីគោរព
• លោក Theodore Allegra (សៀ ដ័រ អាល់ឡេក្រា) អនុប្រធាន​បេសកម្ម​ការទូត​ នៃ​ស្ថាន​ទូត​ សហរដ្ឋអាមេ​រិក​ប្រចាំ​នៅ​កម្ពុជា ជាទី​ស្រឡាញ់​រាប់អាន​
• ឯកឧត្តម លោកជំទាវ លោក លោកស្រី អ្នកនាង កញ្ញា សមាជិក-សមាជិកា ក្រុមប្រឹក្សា​គណៈមេធាវី​ សមាជិក​-សមាជិកា​គណៈមេធាវី នៃព្រះរាជាណាចក្រកម្ពុជា ជាទីរាប់អាន

ថ្ងៃនេះ​គឺជា​ទិវា​​ដ៏​​មាន​សារៈ​សំខាន់​សម្រាប់​​គណៈ​មេធាវី​ នៃព្រះរាជា​ណា​ចក្រ​កម្ពុជា​ ​និង​ សម្រាប់​​រូប​ខ្ញុំ​​ផ្ទាល់​ ​ដែល​បាន​រៀប​ចំ​ ​ពិធី​ចុះ​ហត្ថលេខា​​លើ​​អនុស្សារៈ​​នៃ​ការ​យោគយល់​រវាង​​គណៈ​​មេធាវី​​នៃ​ ព្រះ​រា​ជា​ណា​ចក្រ​កម្ពុជា​ និង​ទី​ភ្នាក់ងារ​សហរដ្ឋ​​អាមេរិក​​ដើម្បី​អភិវឌ្ឍន៍​អន្តរជាតិ ​នេះ​ជា​ជំហាន​ថ្មី​មួយ​ទៀត​ ដែល​ធ្វើ​អោយ​គណៈ​មេធាវី​កាន់​តែ​រឹង​មាំ​ ​ដើម្បី​​​ចូល​រួម​​គ្រប់​សកម្មភាព​សង្គម​​។
ឆ្លៀត​​ក្នុង​ឱកាស​​នេះ​ ខ្ញុំ​សូម​ស្វា​គមន៍​យ៉ាង​កក់​ក្តៅ​​បំផុត ​ចំពោះ​​ឯកឧត្តម​ ច័ន្ទ ​តានី ​រដ្ឋ​លេខា​ធិ​ការ​ ទីស្តី​ការ​គណៈ​រដ្ឋមន្រ្តី​ ​តំណាង​​ដ៏ខ្ពង់​ខ្ពស់ ឯ​ក​​ឧត្តម​បណ្ឌិត​ ​សុខ​​ អាន​ ឧបនាយក​​រដ្ឋ​មន្រ្តី​​ រដ្ឋ​មន្រ្តី​ទទួល​បន្ទុក​ទី​ស្តី​ការ​គណៈ​រដ្ឋ​មន្រ្តី​ដែល​បាន​អញ្ជើញ​ចូល ​រួម​ ​ធ្វើ​​ជា​​សាក្សី ​ក្នុង​ពិធី​ចុះ​ហត្ថ​លេខា​ថ្ងៃ​នេះ​និង ​សូម​ស្វាគមន៍​ចំពោះ​​លោក​ ​Flynn​ Fuller​ (ផ្លីន ហ្លូល័រ) នា​យក​​បេសកម្ម​​ទី​ភ្នាក់​ងារ​​សហរដ្ឋ​​អាមេរិក​​ ដើម្បី​​អភិវឌ្ឍន៍​អន្តរ​ជាតិ​​​នៅ​កម្ពុជា និង​លោក Theodore Allegra (សៀដ័រ អាល់ឡេក្រា) អនុប្រធាន​បេសកម្ម​ការទូត​ នៃ​ស្ថាន​ទូត​ សហរដ្ឋអាមេ​រិក​ប្រចាំ​នៅ​កម្ពុជាខ្ញុំ​សូមស្វាគមន៍ផងដែរ​ចំពោះ  ​ឯក​ឧត្តម​ លោកជំទាវ លោក លោកស្រី សមាជិក-សមាជិកា​ ក្រុមប្រឹក្សា​គណៈមេធាវី សមាជិក​-សមាជិកា​ គណៈមេធាវី ដែលបានចូលរួម ក្នុងពិធីថ្ងៃនេះ ។

គោលបំណងនៃការចុះអនុស្សារណៈ​ នៃការយោគយល់​នេះ គឺដើម្បីរៀបចំ​ជាផ្លូវការ​នូវកិច្ច​សហប្រតិបត្តិការ រវាង​គណៈមេធាវីនៃព្រះរាជាណាចក្រកម្ពុជា​និងទីភ្នាក់ងារ​សហរដ្ឋអាមេរិក​ ដើម្បី​អភិវឌ្ឍន៍​អន្តរជាតិ​ លើ​សកម្មភាព​សំខាន់ៗ ជា​សក្តា​នុ​ពល​ មួយចំនួន​គឺ៖

១.ការជួយដល់មជ្ឈមណ្ឌល​បណ្តុះបណ្តាល​វិជ្ជាជីវៈមេធាវី
ក្នុង​ការ​អប់រំ​ផ្នែក​ច្បាប់ ​សីល​ធម៌​វិជ្ជា​ជីវៈ ​ការដោះ​ស្រាយ​វិវាទ​​ក្រៅ​ផ្លូវ​តុលាការ​ និង​​មុខ​វិជ្ជា​​មួយ​ចំនួន​ទៀត ​ ដល់​សិស្ស​មេធាវី​ដែលកំពុងសិក្សា​នៅទីនោះ អោយពួកគេមានគុណភាព ​សមត្ថ​ភាព​ និងមានសីលធម៌​ល្អ ដើម្បីបម្រើ​ផលប្រយោជន៍ យុត្តិធម៌ ដល់សង្គមជាតិ កម្ពុជា

 ២.ការពង្រឹងស្ថាប័ន
ទីភ្នាក់​សហរដ្ឋ​អាមេរិក​​ដើម្បី​អភិវឌ្ឍន៍​អន្តរ​ជាតិ ​នឹង​ជួយ​គណៈ​មេធាវី​​នៃ​ព្រះ​រាជា​ណា​ចក្រ​កម្ពុជា ​ដើម្បី​ពង្រឹង​​ប្រព័ន្ធ​ស្ថាប័ន​ និង​ហិរញ្ញ​វត្ថុ​​របស់​ខ្លួន ​ព្រម​ទាំង​​ជួយ​ធ្វើ​​ឲ្យ​​​ល្អ​​ប្រសើរ​​ឡើង​នូវ​​ប្រព័ន្ធ​​គ្រប់​គ្រង​​ ផ្ទៃក្នុង​របស់​គណៈ​មេធាវី​នៃ​ព្រះ​រាជា​ណាចក្រ​កម្ពុជា ​ការងារ​នេះ​អាច​​ធ្វើ​ឡើង​ក្នុង​​ទម្រង់​​នៃ​​ការ​ផ្តល់​​ជំនួយ​​​ បច្ចេកទេស​ និង​ទីប្រឹក្សា​​ក្នុង​រយៈ​ពេល​ខ្លី ​ដើម្បី​ជួយ​គណៈ​មេធាវី​នៃ​ព្រះរាជា​ណា​ចក្រ​កម្ពុជា​​អាច​បង្កើត​ ប្រព័ន្ធគណនេយ្យ​ប្រកបដោយ​តម្លាភាព និង​ជួយ​ធ្វើ​សេចក្តីព្រាង​គោល​នយោបាយផ្ទៃក្នុង​ ឬជំនួយ​ផ្សេងៗទៀត​ទៅតាមការ​ព្រមព្រៀង ។

៣.គណៈកម្មការ​ទាំងបី
​ទីភ្នាក់ងារ​សហរដ្ឋអាមេរិក​ដើម្បី​អភិវឌ្ឍន៍​អន្តរជាតិនឹងជួយ​ គណៈមេធាវីនៃព្រះរាជាណាចក្រកម្ពុជា ក្នុងការពង្រឹង​គណៈកម្មការ​ទាំងបី គឺគណៈកម្មការ ​កិច្ចការរដ្ឋប្បវេណី គណៈកម្មការកិច្ចការព្រហ្មទណ្ឌ​ ​និង ​គណៈ​កម្មការកិច្ចការពាណិជ្ជកម្មតាមរយៈ​ការ​ផ្តល់​ជំនួយ​ឧបត្ថម្ភផ្នែកបច្ចេកទេស​ និងហិរញ្ញវត្ថុ​ដើម្បីធ្វើ​អោយប្រសើរឡើង​នៅក្នុងកម្មវិធីផ្សព្វផ្សាយ​ កម្មវិធីស្រាវជ្រាវ និងកម្មវិធីបំផុស​ការ​យល់ដឹង ដល់​សមាជិកគណៈមេធាវី និងសាធារណជន ។

៤.កម្មវិធីជំនួយផ្នែក​ច្បាប់
ទីភ្នាក់ងារ​សហរដ្ឋអាមេរិក​ដើម្បី​អភិវឌ្ឍន៍​អន្តរជាតិ នឹងជួយពង្រឹង​ នាយកដ្ឋានការពារ​ក្តីជូនជន​ ក្រី​ក្រតាម​រយៈ​ការ​ផ្តល់​បច្ចេក​ទេស ​​និង​ហិរញ្ញវត្ថុ​ ​ដល់​​សិស្ស​​មេធាវី​​ដែល​ទើប​​បញ្ចប់​​ការ​សិក្សា​​ពី​​មជ្ឈមណ្ឌល​​បណ្តុះ​ បណ្តាល​​វិជ្ជា​ជីវៈ​មេធាវី​ អោយ​ពួក​គេ​ក្លាយ​ទៅ​ជា​​មេធាវី​​កម្មសិក្សា​​​មាន​​បទ​​ពិសោធន៍​​​​​​គ្រប់ ​គ្រាន់​​ក្នុង​ការ​​​ផ្តល់​​ជំនួយ​​​​ផ្នែក​​ច្បាប់​ដល់​ជន​ក្រី​ក្រ​  និង​តស៊ូមត​ិ តាម​ផ្លូវ​តុលា​ការ​ ។​​

តាមរយៈនេះ គណៈមេធាវីនៃព្រះរាជាណាចក្រកម្ពុជានឹងខំប្រឹង​ប្រែង​អនុវត្តអោយមាន​ ប្រសិទ្ធភាព ទទួលបានផ្លែផ្កា និងទទួលបានសមិទ្ធិផល​ថ្មីៗថែមទៀត ដែលកើតចេញ​ពីកិច្ច​សហ​​ប្រតិបត្តិការ​​នេះ  ។ ខ្ញុំសង្ឃឹមថា ទីភ្នាក់ងារ​សហរដ្ឋអាមេរិក​ដើម្បី​អភិវឌ្ឍន៍​អន្តរជាតិ នឹងជួយ​គណៈមេធាវីទៅលើ​គម្រោងផ្សេងៗទៀតដែលចាំបាច់ ក្នុងការចូលរួមពង្រឹង​យុត្តិធម៌ និងភាពស្អាត​ស្អំ​នៅកម្ពុជា ហើយខ្ញុំជឿជាក់ថាមេធាវី​ គឺជា​ចលករមួយ​ដែលធ្វើអោយ​សង្គមមានយុត្តិធម៌ ។

ជាថ្មីម្តងទៀត ខ្ញុំ​សូមថ្លែងអំណរគុណយ៉ាងជ្រាលជ្រៅ​បំផុត ចំពោះឯកឧត្តម ច័ន្ទ តានី រដ្ឋលេខាធិការ ទីស្តីការគណៈរដ្ឋមន្រ្តី​ តំណាង​ដ៏ខ្ពង់ខ្ពស់​ ឯក​ឧត្តមបណ្ឌិត​
សុខ​ អាន ឧបនាយក​រដ្ឋមន្រ្តី​ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីដែលបាន​ចំណាយ​ ពេលវេលាដ៏មានតម្លៃ ចូលរួមជាអធិបតី និងជា​សាក្សី​ក្នុងពិធី​ចុះលើ​ហត្ថលេខាលើ​អនុស្សា​រណៈ​នាពេលនេះ និងសូមថ្លែងអំណរគុណដល់​ឯក​ឧត្តម អស់លោក លោកស្រី ភ្ញៀវជាតិ អន្តរជាតិ សមាជិក-សមាជិកាក្រុមប្រឹក្សា​គណៈមេធាវី សមាជិក​-សមាជិកា​គណៈមេធាវី ដែលបានចូលរួមក្នុងពិធីថ្ងៃនេះ​ ។

ជាទីបញ្ចប់​ខ្ញុំ​សូមជូនពរដល់ឯកឧត្តម​ លោកជំទាវ អស់លោក លោកស្រី អ្នកនាង​កញ្ញា ភ្ញៀវជាតិ និង​អន្តរ​ជាតិ ដែលបានចូលរួម​ក្នុងពិធីចុះហត្ថលេខានាពេលនេះ សូមប្រកប​តែ​​​សេចក្តីសុខ សេចក្តីចម្រើន​ និងទទួលបាន​ពុទ្ធពរទាំងបួនប្រកា​រ គឺ​អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។  សូមអរគុណ!