-លោកMITSUHARU TAKAGIអនុប្រធាន​សហព័ន្ធ​ គណៈមេធាវី​ប្រទេស​ជប៉ុន និង​គណៈប្រតិភូ​ទាំង​អស់​ជាទីគោរព

            -លោកSUZUKI YASUJIROU ប្រធាន​អង្គការ​JICA ប្រចាំ​នៅ​ប្រទេសកម្ពុជា ជាទីគោរព​

         -លោក លោកស្រី សមាជិក សមាជិកក្រុមប្រឹក្សា​គណៈមេធាវី នៃព្រះរាជាណាចក្រកម្ពុជា​

         -ឯកឧត្តម អស់ លោក លោកស្រី ជាវាគ្មិន

                   -ឯកឧត្តម លោក ជំទាវ លោក លោកស្រី អ្នកនាងកញ្ញា​ទាំងអស់ដែលបានចូលរួម​ក្នុង​អង្គសិក្ខា​សាលា​​នេះ​ ជាទីរាប់អាន ។

         ថ្ងៃនេះខ្ញុំមានកិតិ្តយសនិងសេចក្តីសោមន្ស​រីករាយយ៉ាងខ្លាំងដែល​បាន​ចូលរួមជាអធិបតី ​ក្នុងពិធីបើ​កអង្គសិក្ខាសាលាស្តីពី « ការគ្រប់គ្រង​ និងឯករាជ្យភាពរបស់គណៈមេធាវី»  ដែលរៀបចំឡើងដោយ​​      គណៈមេធាវីនៃព្រះរាជាណាចក្រកម្ពុជា ក្រោមកិច្ចសហប្រតិបត្តិការ ពី​​គណៈ​មេធាវី​ជប៉ុន ​​និង​អង្គការ JICA ការរៀបចំសិក្ខាសាលា​នេះ ដើម្បីបង្ហាញអំពីការគ្រប់គ្រង​ និងឯករាជ្យភាព​របស់​    គណៈមេធាវី​ជារួម និងដោយឡែកចំពោះ​គណៈមេធាវីនៃព្រះរាជាណាចក្រកម្ពុជា ។ វិជ្ជាជីវៈមេធាវីជាវិជ្ជាជីវៈឯករាជ្យ ស្វ័យភាព ក្នុងការចូលរួមបម្រើ​វិស័យយុត្តិធម៌ ហើយ​វិជ្ជាជីវៈនេះ អាចប្រកបទៅបាន​តែក្នុងក្របខ័ណ្ឌនៃគណៈមេធាវីនៃព្រះរាជាណាចក្រកម្ពុជាតែប៉ុណ្ណោះ ការគ្រប់គ្រងនិង​ត្រួតពិនិត្យ​វិជ្ជាជីវៈមេធាវី គឺជាសមត្ថកិច្ច​របស់​គណៈមេធាវីនៃព្រះរាជាណាចក្រកម្ពុជា ដែល​​​​ឯករាជ្យ​ពីអំណាចនីតិបញ្ញត្តិ នីតិប្រតិបត្តិ និងអំណាចតុលាការ មានតែក្រុមប្រឹក្សា​គណៈមេធាវីទេ​ដែលអាច​ពិនិត្យ​និងដោះស្រាយ​រាល់បញ្ហាទាំងអស់ដែលទាក់ទង​នឹងវិជ្ជាជីវៈមេធាវី ។

         គណៈមេធាវីត្រូវដឹកនាំដោយប្រធាន និងគ្រប់គ្រង​ដោយ​ក្រុមប្រឹក្សាគណៈមេធាវី ។​ ទោះជា​សព្វថ្ងៃនេះ គណៈមេធាវី​មានការ​លំបាកយ៉ាងណាក៏ដោយ ពាក់ព័ន្ធជាមួយនឹងឯករាជ្យភាព និងការ​គ្រប់គ្រង​គណៈមេធាវី ដោយសារគណៈមេធាវី មិនទាន់​មាន​ថវិកាគ្រប់គ្រាន់ដើម្បីដំណើរការ​សកម្មភាព​របស់ខ្លួន​ បានល្អប្រសើរ​ ប៉ុន្តែខ្ញុំមានជំនឿថា ការខិតខំរបស់ខ្ញុំ រួមជាមួយ​សមាជិក​ សមាជិកា ក្រុមប្រឹក្សា​គណៈមេធាវី និង​សមាជិក​ សមាជិកា​ មេធាវីទាំងអស់ នឹងធ្វើ​អោយគណៈមេធាវី ក្លាយ​ទៅជាស្ថាប័ន​ឯករាជ្យ និងមានការគ្រប់គ្រងល្អ រឹងមាំនៅ​ថ្ងៃអនាគត​ឆាប់​ៗ ជាក់ជាមិនខាន ។

         ខ្ញុំ​សង្ឃឹមថា អង្គការ​សិក្ខាសាលា​នេះ នឹង​នាំមកនូវចំណេះដឹងថ្មីបន្ថែមទៀត ដល់អស់លោក​លោកស្រី អោយ​យល់អំពីតួនាទី របស់ខ្លួន​ ការគ្រប់គ្រង​ និងឯករាជ្យភាព​គណៈមេធាវី ហើយខ្ញុំជឿ​ជាក់ថា អស់លោក​ លោកស្រី​នឹងមានសំណួរដេញដោលជាមួយវាគ្មិនយើង ពាក់ព័ន្ធនឹង​ប្រធាន​បទ​ខាងលើ យ៉ាងផុសផុលជាក់ជាមិនខាន ។

         មុននឹងបញ្ចប់​ខ្ញុំសូមថ្លែងអំណរគុណយ៉ាងជ្រាលជ្រៅ​ចំពោះ សហព័ន្ធគណៈមេធាវីជប៉ុន​ អង្គការ​JICA ដែលបានជួយឧបត្ថម្ភ ផ្នែកហិរញ្ញវត្ថុ ដើម្បីរៀបចំ​អោយមានសិក្ខាសាលានេះឡើង ។   សូមអរគុណចំពោះ​វាគ្មិនជាតិ និងអន្តរជាតិ ដែលបានចូលរួម​ក្នុងអង្គសិក្ខាសាលានេះ ជាពិសេស​សមាជិក សមាជិកា​គណៈមេធាវី ដែលមាន​វត្តមាននៅទីនេះ ។

         ជាទីបញ្ចប់​ខ្ញុំ​សូមប្រសិទ្ធពរ​ជូនអស់លោក លោកស្រី ភ្ញៀវជា​តិ និងអន្តរជាតិ សមាជិក​ សមាជិកា​ គណៈមេធាវីទាំងអស់ សូមជួប​តែពុទ្ធពរបួន​ប្រការគឺអាយុ វណ្ណៈ សុខៈ ពលៈ កុំបីឃ្លៀង​ឃ្លាតឡើយ ។

         ខ្ញុំសូមប្រកាស​បើកអង្គសិក្ខាសាលាចាប់ពីពេលនេះតទៅ ។

សូមអរគុណ !